📣📣📣一連四日既美酒佳餚巡禮開始左啦！今年多左好多野食同攤檔，範圍仲伸延到添馬公園，可想而知今年既活動有幾豐富🤩介紹下我食左啲咩先🐥
1️⃣脆皮燒腩越南包 $60 (4/5) 📍Banh Mi Kitchen S02
💬入場後第一件事就係覓食🤤🤤見到呢檔賣越南包好似幾吸引，就買左個試。越南法式麵包軟熟唔韌，但如果個皮烘得再脆啲就更好。餡料有燒腩肉，啖啖肉得黎個皮仲好脆👍🏻👍🏻加埋啲紅蘿蔔絲、洋蔥、芫萎，同少少醬汁，酸酸甜甜，清新開胃，又唔會好乾😋
2️⃣玖五牛三寶 $80 (4/5) 📍玖五牛肉麵 S01
💬超蓮經營的台灣玖五牛肉麵今次都有參與，雖然成碗牛肉麵就冇啦，但都可以試到啲牛肉。選擇左玖五牛三寶，有牛肉、牛筋、牛肚。牛肉鬆化好入味；牛筋軟淋而且口感彈牙，充滿住膠質；牛肚都整得唔錯，唔韌、爽口彈牙😄
3️⃣雙重芝士燒扇貝 $60/2隻 (4.5/5) 📍Argentina A403
💬見到芝士就會雙眼發光既我，見到芝士燒扇貝又點會放過佢😍😍😍即燒即食，熱到飛起，面頭係厚厚既一層芝士，厚到睇唔到粒扇貝🤣芝士有輕微拉絲效果😈扇貝都好大粒，火喉啱啱好，冇燒到過熟。
4️⃣烏拉圭和牛 $60 (1/5)📍Argentina - De La Valley A402
💬真心唔推介大家試呢間👎🏻👎🏻👎🏻本身見到都有唔少人排隊，諗住都唔會太伏，而且俾佢燒牛肉既香味吸引左而去。選擇有三款，阿根廷牛柳、烏拉圭和牛、阿根廷肉眼扒，心大心細之下揀左和牛。排隊買唔算耐，但冇諗過要等一個鐘先有得食！！最初唔知，等左八個字覺得唔對路，見旁邊既人都走埋去問，又聽到個職員問係咪想取消order，一問之下職員先話要預一個鐘😓😓😓食你個幾粒燒和牛要等一個鐘，so crazy!!! 但既然都等左咁耐唔差在個二十分鐘，於是我地決定係附近飲下食下先。到返去個陣見到已經話all sold out，咁應該我地係水尾，相信都好快有，點知都要等左10分鐘，中間仲有好多號碼叫左冇人應，突然間佢連叫好幾個號碼，終於有我地啦！一拎到手，完全唔熱既有冇搞錯，係暖都唔暖😡明明見後面一路有人燒緊，好明顯係有啲整好冇人拎，放左一陣就俾之後啲號碼。都唔緊要，希望好食，點知一咬，韌到你媽媽都唔認得🙉🙉🙉咬左幾耐先吞到，仲話係招牌，失望😑如果要人預一個鐘等，應該係客人俾錢買之前同人講聲，唔係一味識收錢就算。如果知道清唔切條queue，係咪應該考慮一下截龍先？！安排實在太差🙅🏼♀️🙅🏼♀️浪費左我好多時間😫
5️⃣台式麻辣三小拼 $60 (3.5/5)📍酒鍋 D012
💬三小拼有台灣空運黎既鴨血、臭豆腐、花膠，麻辣湯底係佢地自家秘製既。我本身唔太食得辣，主要都係朋友食哂😂 但聞到好香，我最後忍唔住試左舊花膠，好淋但都真係好辣，非常香濃惹味！食得辣既朋友可以去試下~~👍🏻
6️⃣ 杏仁雪糕、蜂蜜味雪糕 $60/2支 (4.5/5)📍Pan Pacific/Magnum D104-108
💬用美食券可以享用買一送一優惠，原本六十蚊一支，而家就買到兩支，仲有冰袋送，我地揀左杏仁同蜂蜜味。杏仁味偏甜，但脆皮有nuts，就會有咬口啲。蜂蜜味相對冇咁甜，有淡淡既蜂蜜味，食完咁多濃味食物之後，個人比較推介蜂蜜味。
7️⃣Classic Black Label Highball - with rosemary and iceblock (3.5/5)📍Johnnie Walker C104-109
💬酒方面我主要想介紹Johnnie Walker，每年入場都好期待，一黎佈置靚，而且佢地通常三個token就有好大杯，仲要用佢地自己logo既杯裝。Classic呢款要兩個token，如果加埋迷迭香同冰塊，就要加多一個token。迷迭香會用火燒一燒先，而冰塊都係有迷迭香，更加突出威士忌既味道，但始終多冰，味道飲落就會淡左。除左我地飲呢隻，仲有另一款black label highball with cold brew earl grey tea，都好受歡迎！
Search